«Сенің дертіңе шипа таппадық»: Тоқтар Серіков дерттен көз жұмған інісіне жазба арнады

Қазақ эстрадасының жарық жұлдызы Тоқтар Серіков марқұм інісіне жазба арнады. Бұл туралы Taspanews.kz Тоқтар Серіковтың Instagram-дағы ресми парақшасына сілтеме жасап хабарлайды.

Өнер иесінің айтуынша, інісі дертіне дауа таппай көз жұмған. «Мемлекеттің емдеуге дәрмені жетпеді» деген әнші марқұм бауырынан кешірім сұрады.

«Менің аяулы анам және сүйікті шөбересі – Мырзәлі. Әжесі қайтқан жаққа шөбересі де қайтты. Осылай жазу қандай ауыр десеңші?! Алтыным, ағатайлап құшақтап баурап алатын жан бауырым еді. Жастайыңнан жабысқан дертіңе бір мемлекеттің дәрмені жетпеу, арашалап алып қалмау өкініш болып тұр, ботақаным! Сен секілді көзі мөлтілдеген балапандар, біз секілді шырылдаған ата аналар әлі жетеді. Қайырымы жоқ қоғам, безбүйрек басшылар бұл дүниені қайдан түсінсін?! Балапаным, қош бол! Сенің дертіңе шипа таппадық. Қорғап қала алмадық. Кешір бізді. Сен осындай болашағына бейқам қарайтын қоғамда тудың. Раббың қабыл алып, әжеңе жеткен шығарсың, құлыным! Әжеңе бәрін айт! Әжеңмен қорқытушы едің ғой. Әжеңе «қомағай қоғамның қолтырауындары әлі тойған жоқ» де. Алтыным, балапаным, мәңгілік мекенің жәннәт болсын!», – деп жазды әнші.