«Туыстардың үйіне бей уақытта бара алмаймыз»: Досымжан Таңатаров ағайын-туыстың мәселесін айтты
Қазақстандық танымал әнші Досымжан Таңатаров отбасы мәселесін көтеріп, ағайын-туыспен араласудың маңыздылығын айтты. Бұл туралы Taspanews.kz хабарлайды.
Өнер иесі бұрынғы кездерді сағынатынын айтты.
«Біз бұрын басқа уақытта тәрбиелендік, туыстарымыздың үйіне емін-еркін бара алатынбыз. Қазір ешкім ешкімге беймезгіл, бей уақытта бара алмайды. Барса хабарласып, алдын ала айтады. Біздің кезде телефон да жоқ, үйіне барып алып, үйінде жоқ болып қалып, есігінің алдында отыра беретінбіз. Түннің бір жарымында құда бола ма, басқа бола ма, бір көрген адамның үйіне кіре беретінбіз. Олар оны кәдімгідей қабылдайтын, олар сосын жоқты да, барды да қабылдай беретін. Сын көзбен қарамайтын, оны біз де қабылдай беретінбіз, осындай екен болды дегендей. Солармен бірге аштықты-тоқтықты көріп, бар нәрсені жеп дегендей. Қазір бөтен түгілі өзіңнің туысыңның өзі «біз келе жатырмыз, бола ма, болмай ма» деп ескертеді. Ол болмайды десе ренжуге хақың жоқ. Сондықтан ұл-қыздарымыз басқа уақытта тәрбиеленіп келе жатыр», – деді әнші.
