Алматыда жастар есірткіге қарсы шағын футбол ойнады

Алматыда нашақорлықпен күресуге бағытталған жастар арасында шағын футболдан турнир өтті, – деп хабарлайды Taspanews ҚР Ішкі істер министрлігінің порталына сілтеме жасап

Бұл шара Халықаралық нашақорлыққа және есірткінің заңсыз айналымына қарсы күрес күніне арналған есірткіге қарсы айлық, сондай-ақ AlmaCUP жобасы аясында өткізілді. Турнирге 20-дан астам команданың атынан Алматы қаласының жоғары оқу орындары мен колледждерінің студенттері қатысты. Басты мақсат – есірткісіз ұрпақ өсіру.

Алматы қалалық ІІД Есірткі қылмысына қарсы күрес басқармасының бастығы Мәди Құрманжанов салауатты ұрпақ елдің болашағы деп атап өтті. Ол 1987 жылдан бері 26 маусым халықаралық нашақорлық пен есірткінің заңсыз айналымына қарсы күрес күні ретінде атап өтілетінін еске салды. Құрманжанов нашақорлықтың жаһандық, әсіресе жастар арасында қауіп төндіретін проблема екеніне тоқталды. Жастар күнделікті қиындықтардан құтылудың жолдарын іздеген сайын бұл құбылыс жиі кездеседі. Ол, сондай-ақ, өмірмен мұндай эксперименттердің құны өте жоғары екенін және оның салдары көбінесеь нашар болатынын айтты.

Қазақстан нашақорлықтың алдын алуға және онымен күресуге бағытталған көптеген жобалары бар дәйекті және нақты мақсатты есірткіге қарсы стратегияны жүзеге асыруда.

Қорытындылай келе, Құрманжанов барлығын нашақорлықтан, темекі мен алкогольден бас тартуға, «жоқ» деп, салауатты өмір салтын таңдауға шақырды.