2025 жылдан бастап мыңнан астам этникалық қазақ қандас мәртебесін алды
2025 жылдың басынан бері мыңнан астам этникалық қазақ қандас мәртебесін алды2025 жылдың қаңтарынан бастап 1 070 этникалық қазақ тарихи отанына оралып, қандас мәртебесін алды, – деп хабарлайды Taspanews.kz ҚР ЕХӘҚМ сілтеме жасап.
Жалпы, 1991 жылдан бері республикаға 1 млн 149 мыңнан астам этникалық қазақ қоныс аударды.
Осы жылы қандастардың негізгі бөлігі Қытайдан (51,9%) және Өзбекстаннан (37,5%) келді. Сонымен қатар, 7,1%-ы Түрікменстаннан, 1,8%-ы Ресейден және 1,7%-ы басқа елдерден көшіп келген. Олардың 60,2%-ы еңбекке қабілетті жаста, 32,9%-ы кәмелетке толмағандар, ал 6,8%-ы зейнеткерлер.Білім деңгейі бойынша қандастардың 16,7%-ы жоғары білімді, 32,9%-ы орта кәсіби білімді, 48,4%-ы жалпы орта білімді, ал 1,9%-ының білімі жоқ.
Қандастар Ақмола, Абай, Атырау, Қостанай, Павлодар, Шығыс Қазақстан, Батыс Қазақстан және Солтүстік Қазақстан облыстарына қоныстануда.2025 жылы осы еңбек күші тапшы өңірлерге қандастарды қабылдау квотасы 2 309 адамды құрайды. 1 ақпандағы жағдай бойынша бұл өңірлерге 171 қандас көшіп келді.
Мемлекеттік қолдау аясында қоныстанушыларға көшуге арналған бір реттік субсидия беріледі: отағасына және отбасының әрбір мүшесіне 70 АЕК (275,2 мың теңге).
Сондай-ақ, тұрғын үй жалдау мен коммуналдық төлемдер үшін бір жыл бойы 15-30 АЕК (59-118 мың теңге) мөлшерінде көмек көрсетіледі.
Ерікті қоныс аудару тиімділігін арттыру үшін тұрғын үй сатып алу немесе ипотекалық қарыз бойынша бастапқы жарнаны жабуға арналған экономикалық ұтқырлық сертификаты енгізілген. Оның мөлшері тұрғын үй құнының 50%-ын немесе бір отбасыға 4,56 млн теңгеге дейінгі соманы құрайды.
