Абай облысы әкімі Семейдегі баланы ұрып-соғу бойынша жиналыс өткізді
Абай облысы әкімі Берік Уәли Семей қаласындағы жасөспірімдердің баланы ұрып-соққандығы бойынша жиналыс өткізді, – деп хабарлайды Taspanews.kz облыс әкімдігіне сілтеме жасап.
Жәбірленушіге психологиялық орталық мамандары көмек көрсетуде екені айтылды, Ал құқық бұзған жасөспірімдердің заңды өкілдері жауапқа тартылды.
Облыстық Білім басқармасы жанынан арнайы мониторингтік топ құрылды. Қызметтік тексеріс жүргізілуде. Оның қорытындысы бойынша мектеп басшылығының тәрбие мен бақылау жұмысында дұрыс қызмет атқармауы бойынша жауапкершілікке тарту қарастырылады.
Осы орайда жиналыс барысында облыс әкімі келесіні жеткізді:
«Облыстағы барлық мектеп қатаң бақылауда болуы тиіс. Білім басқармасы құқық қорғау органдарымен бірге оқушылармен және олардың ата-аналарымен түсіндірме жұмыстарын жүйелі түрде жүргізу қажет. Өңірдегі мектептердің қауіп-қатер картасы жасалып, осындай жағдайлар кезінде жедел әрі үйлесімді әрекет етуге арналған нақты іс-шаралар алгоритмі дайын болуы керек»,
Еске салсақ, 22 ақпан күні Семейде жасөспірімдер баланы ұрып-соғып, тепкілеген. Кәмелетке толмағандардың құқығын қорғау жөніндегі комиссия жасөспірімдерді психологтармен жұмыс істеу мақсатында девиантты мінез құлқы бар балаларға арналған мамандандырылған мектепке жіберуді ұсынды.
"Комиссия үш ата-ананы ата-ана құқықтарынан айыру және бір өкілге қатысты екі балаға қамқоршылықты тоқтату туралы ұсыныс жасады",
