"Әкімдік амал жоғын айтып, не істерін білмейді": Астана маңындағы апатты бұршақ салдары

Астана қаласы маңындағы Қараөткел ауылының (2006 жылға дейін – Ильинка) тұрғындары Taspanews.kz редакциясымен байланысып, басынан өткен жағдайды хабарлады. Олар 8 тамызда үйлер мен шаруашылық қора-жайлардың шатырларына зақым келтірген қатты бұршақ жауғанына шағымданады. Жергілікті билік өкілдері алдағы қолайсыз ауа-райы туралы ескертпеген, сондай-ақ төтенше жағдай режимін енгізбеген. Ауыл тұрғындары бүлінген мүлік үшін өтемақы ала алмай жүргендерін айтты.

Күтпеген қолайсыз ауа-райы

"Біз Ильинка тұрғындарымыз, бұл Астана қаласының маңы. Бұршақтан зардап шектік, миллиондаған шығынға ұшырадық. Үйлердің төбелері тесілген. Бірақ әкімдік амал жоғын айтып, не істерін білмейді. Ақша жоқ дейді", - деді қала маңы тұрғыны редакцияға.

Ол болған оқиғадан кейін "Қазгидрометке" табиғи апат туралы алдын ала белгілі болған-болмағанын анықтау үшін сауал жібергенін айтты. Әкімдік өткен "қатты жаңбыр, бұршақ және жел" туралы алдын-ала хабарланғандығын растайтын жауап алды.

"Әкімдіктің поштасына сегізінші тамызға арналған ауа-райы болжамы алдын ала жіберілген. Осындай жауап келді. Бірақ ТЖ режимін ешкім жариялаған жоқ, сондықтан осы жылдың көктеміндегі су тасқыны кезінде сияқты төлемдер бізге жасалмайды. Онда қатты жел аралас найзағайлы ауа-райы орнап, жаңбыр да, бұршақ та молынан жауатыны жазылған – мен төтенше жағдай енгізу үшін немесе кем дегенде тұрғындарға ескерту жасау үшін басқа тағы не жазу керектігін білмеймін.", - деді ашулы әйел.

Ол қолайсыз ауа-райынан зардап шеккен үй иелері әкіммен кездесуге барғанын, бірақ ешкім көмектесе алмағанын айтты. Әкімдік өкілі мен төтенше қызметтер қызметкері оқиға орнына барып, ауыл тұрғындарымен бірге шатырлардағы тесіктерді суретке, видеоға түсіріп, тіркеді. Біріккен күш-жігерге қарамастан, үй иелері билік тарапынан ешқандай іс-әрекет болмайды деп қорқады.

Шығын миллиондармен өлшенді

"Барлығы бір-біріне нұсқайды. Қалада не істерін білмейді, ауданға барыңыз дейді. Аудан Экология министрлігіне шағымданыңыз дейді. Содан кейін біреу егер үй сақтандырылмаған болса, сізге көмек берілмейді дейді. Кімге жүгіну керектігін білмеймін", - деді ренішін білдіріп әйел.

Оның айтуынша, бұршақ барлық жерде жаумаған. Ол қоныстанған қала маңында ғана үй иелері айтарлықтай зардап шекті. Ал басқа жақынырақ жерлерде тек жаңбыр жауған.

" 70-100 үй зардап шекті, нақты санын білмеймін. Бізге ауқымды табиғи апат болмағанын түсіндірді. Бұршақ сипап өткендей айтады. Бес-ақ минутқа созылыпты. Алайда, маған шығын өтеу үшін 3 миллион теңге қажет", - деп шағымданды әйел.

Ол ауыл тұрғындарының барлығы дерлік миллиондаған шығынға ұшырағанын атап өтті.

"Менің үйімнің өзіне миллиондаған теңге қажет. Жұмысы үшін үш бригада кем дегенде осы соманы талап етті. Алайда, басқа тұрғындарда әр түрлі материал: біреуде – гипсокартон, екіншісінде – керме төбелер. Олардың барлығы жарамсыз болып қалды. Ал кейбіреулерінде ламинат көтеріліп, тұсқағаз ажырап жатты", - деп түсіндірді ол.

Ауыл тұрғыны үй иелері "мемлекет оларға шығынның тиісті мөлшерін төлемейтінін" түсінетінін айтты.

"Жөндеу 200-300 мың теңгеге шақ емес, әлдеқайда қымбат. Мемлекет бізге мұндай ақшаны төлемейтіні түсінікті. Адамдар билік тарапынан қандай да болсын көмек болса деп үміттенеді", - деп түйіндеді ол.