Ақтөбе-Хромтау аралығында қоғамдық көлік қозғалысы тоқтап қалған: такси жүргізушісі кінәлі ме?
30 наурыздан бастап Ақтөбе-Хромтау аралығында қатынайтын Yutong автобусы халықты тасымалдауды белгісіз уақытқа тоқтатқан. Бұл жағдайға автобустардың сапасы сұрақ туғызатынын мәлімдеген такси қызметкері себепші болуы мүмкін, – деп хабарлайды Taspanews.kz Hromtau LIVE телеграм арнасына сілтеме жасап.
«V-Service» ЖШС 2023 жылдан бастап екі қаланы байланыстыратын қоғамдық көлік қозғалысын ұйымдастырған. Алайда, 28 наурыз күні такси жүргізушісі бұл ЖШС автобустарының алдынғы бет терезесінде жарықшақ бар екенін, сонымен қатар ақауы бар дөңгелекпен жүретінін байқап қалады. Мұны бейнеролик етіп түсіріп, полицияға жіберген.
Такси жүргізушісінің әрекеті автобустардың айыппұл тұрағына жөнелтілуіне себеп болуы мүмкін. Тасымалдаушы да жұмысын уақытша тоқтатқан. Өз сөзінде «V-Service» ЖШС жол нашар болғандықтан тастар терезені бұзатынын және оны ауыстыру тым қымбат екенін мәлімдеді. Қажетті бөлшектерді Алматыдан әкелу қажет болғанын түсіндірді.
Ендігі кезекте, автобустар жоқ. Такси жүргізушілері бұл жағдайдан пайда табуды көздеп, жол ақысын жоғарылатуда. 2000 теңгеден баға 2500-3000 теңгеге дейін артқан.
Автобустар қашан екі қаланы қайта байланыстыратыны белгісіз.
