Ақтөбе облысында жасөспірімнің қазасы бойынша іс сотқа жіберілді

Ақтөбе облысының прокуратурасы Темір ауданы, Қопа ауылында мектеп оқушысының қазасына әкелген қылмыстық іс бойынша тергеуді аяқтап, істі сотқа жолдады, – деп хабарлайды Taspanews.kz ҚР Бас прокуратурасына сілтеме жасап.

Тергеу нәтижесінде, 2023 жылдың 2 қыркүйегінде 10-сынып оқушыларының 11-сынып оқушыларының нұсқауымен 9-сынып оқушыларын «тәрбиелік мақсатта» ұрып-соққаны анықталды. Соның салдарынан кәмелетке толмаған Сыдық Н. ауыр дене жарақаттарынан қайтыс болды.

Оқиғаға байланысты 6 жасөспірім күдікті ретінде қамауға алынды. Олардың біріне ҚР ҚК 106-бабының 3-бөлігі бойынша (абайсызда жәбірленушінің өліміне әкелген қасақана ауыр дене жарақатын келтіру) айып тағылды.

Қалған бесеуі ҚР ҚК 293-бабының 2-бөлігі (бұзақылық) және 106-бабы 3-бөлігінде көзделген қылмысты ұйымдастыру бабы бойынша жауапқа тартылуда.Қылмыстық іс облыстық полиция департаменті тарапынан тергеліп, процеске арнайы прокурор тағайындалды.

Сотта мемлекеттік айыптауды процесс прокуроры қолдайды.

Қылмыстық іс Ақтөбе облысының кәмелетке толмағандардың істері жөніндегі мамандандырылған ауданаралық сотында қаралады.