Алматыда әлеуметтік сала қызметкерлерінің жалақысы артты

Алматы әкімі Ерболат Досаев Әуезов ауданы тұрғындармен кездесуде әлеуметтік сала қызметкерлерінің еңбекақысы 30%-ға артқанын мәлімдеді, – деп хабарлайды Taspanews.kz қала әкімдігіне сілтеме жасап.

Бұл жаңашылдық әлеуметтік қамсыздандыру және білім беру саласының әкімшілік пен көмекші қызметкерлеріне қатысты болды. Шешім мәслихат депутаттары тарапымен қолдау тапты.

"2025 жылға арналған Алматының нақтыланған бюджеті бойынша әлеуметтік салаға арналған шығыс шамамен 40%. Жалақыны көтеру 20 314 қызметкерді қамтиды, олардың ішінде есепшілер, кітапханашылар, психологтар, әлеуметтік және техникалық қызметкер бар. Сондай-ақ медициналық қызметкерді қоспағанда, медициналық-әлеуметтік мекемелердің 1632 қызметкеріне 30% үстемеақы қарастырылған",– делінген Алматы әкімдігі баспасөз хабарламасында.

Қала әкімінің айтуы бойынша, жалақының көтерілуі қызметкерлерді ынталандыруға және қызмет көрсету сапасын жақсартуға әсер етеді.