Алматыда сумен жабдықтау және кәріз жүйесі жаңартылуда
Алматы қаласының «Қайрат» шағын ауданында желілердің құрылысы аяқталуға жақын,– деп хабарлайды Taspanews.kz қала әкімдігіне сілтеме жасап.
Қаланың инфрақұрылымын жақсарту мақсатында Алматының бірнеше шағын ауданында су құбыры және кәріз жүйелерін салу жұмыстары жүргізілуде. Қайрат» шағын ауданында ұзындығы 37,2 км болатын су және кәріз желілерінің екінші кезеңінің құрылысы 2025 жылдың күзіне дейін аяқталады.
2024 жылы Түрксіб ауданындағы «Әлмерек» шағын ауданында 20 км су құбыры мен кәріз желісі, «Жас Қанат» шағын ауданында 8 км су құбыры мен 8,6 км кәріз жүйесі, ал «Төменгі Бесжылдық» шағын ауданында 115 км су құбыры мен 32 км кәріз жүйесі салынды.
Сонымен қатар, «Шуақты» шағын ауданында кәріз сорғы станциясы (КСС) іске қосылды. Бұл жобаның арқасында Волочаевская көшесіндегі 70 үйдің кәріз мәселесі шешілді.
Жаңа инфрақұрылымдық жобалар 21 мыңнан астам тұрғынды сапалы ауыз сумен қамтамасыз етіп, бұрын сумен жабдықтау жүйесіне қосылмаған үйлерге тұрақты су беруге мүмкіндік жасайды. Қалалық әкімдік алдағы жылдары да сумен жабдықтау жүйесін жаңғырту жұмыстарын жалғастыруды жоспарлады.
