Астанада әйеліне зорлық көрсеткені үшін айыпталған экс-дипломат қамауға алынды
Астанада Қазақстан елшілігінің бұрынғы кеңесшісі Сәкен Мамаш әйелін ұрып-соққаны үшін айыпталып, қамауға алынды, – деп хабарлайды Taspanews.kz елордалық полиция департаментінің баспасөз қызметіне сілтеме жасап.
«НеМолчи.kz» қоры дипломаттың үнемі зорлық-зомбылық танытқаны туралы ақпаратты жариялағаннан кейін бұл оқиға көпшіліктің назарын аударды. 2024 жылдың мамырында Қазақстанның Сыртқы істер министрлігі Сәкен Мамашты БАӘ-нен кері қайтарып алу туралы шешім қабылдады.
«Құқық қорғау органдары тергеуді бастап, арнайы топ құрып, сараптамалар жүргізіп, айып тағылу үшін жеткілікті айғақтарды жинады. Тергеу барысында Сәкен Мамаш қамауға алынды»,
Полиция істің басқа мәліметтері жария етілмейтінін мәлімдеді.
Ішкі істер министрлігі зардап шеккен әйелге қолдау көрсетілетінін жеткізді.
Еске салсақ, Қазақстанда тұрмыстық зорлық-зомбылық туралы заң қабылданды. Бұл әлеуметтік зұлымдыққа қарсы күресте маңызды қадам болды. Жаңа заң тұрмыстық зорлық-зомбылық құрбандарын қорғаудың тиімді тетіктерін жасауға және құқық бұзушыларға қатаң шаралар орнатуға бағытталған. Жақындарына жүйелі түрде зорлық-зомбылық көрсеткендер үшін қылмыстық және әкімшілік жауапкершілік қарастырылады.
Дегенмен, тұрмыстық зорлық-зомбылықтың көптеген құрбандары қоғамдық пікірдің талқысында қалудан және қысым көрсетушіден қорқады.
Сонымен қатар, сарапшылар атап өткендей, тергеу барысында қателіктер мен асыра сілтеушілікке жол бермеу үшін мұндай істермен жұмыс істейтін мамандарды арнайы оқыту қажет.
