Атырау облысында оттегінің жетіспеушілігінен мөңке шабақтары қырылды

Атырау облысында мөңке шабақтары суда оттегінің жетіспеушілігінен қырылды,– деп хабарлайды Taspanews.kz Қазақстан Республикасының Ауыл шаруашылығы министрлігіне сілтеме жасап.

Бұл туралы ақпарат Жайық-Каспий облысаралық бассейндік балық шаруашылығы инспекциясына келіп түскен. Атырау облысының Жылыой ауданындағы «Теңіз-Новороссийск» мұнай құбырының 64-ші және 72-ші шақырымындағы балықтарға төнген қауіп-қатер мен қырылуға қарсы іс-қимылдың белгіленген хаттамаларына сәйкес, жедел комиссия оқиға орнына бағыт алды. Балықтың қырылу фактісі расталды.

Нәтижесінде су қоймаларынан 127 килограмм шабақ шығарылды. Атырау облысы бойынша Экология департаменті су анализін зерттеді, алайда балық өлімнің себебін дәл анықтау үшін қолайсыз жағдай қалыптасқан. Шабақтар ыдырап кетті. Қосымша зертханалық зерттеулер үшін су сынамалары жиналды. Апат көктемгі су тасқынынан кейін, Жем өзені өз арнасынан шығып, мөңке шабақтары қолайсыз таяз ағыстарда болған кезде орын алды.

Экологтар балықтардың өліміне әкелген негізгі фактор – судағы оттегінің жетіспеушілігі болды деген қорытындыға келді. Комиссия жергілікті билік органдарымен өзара әрекеттесіп, экологиялық апаттың салдарын одан әрі болдырмауға тырысып, санитарлық нормаларға сәйкес қырылған балықты жинап, кәдеге жаратуды жүзеге асырды.