Қазақстанда дәрі-дәрмекпен қамтамасыз ету жүйесін жақсартудың негізгі шаралары
Қазақстан денсаулық сақтау министрлігінде дәрі-дәрмекпен қамтамасыз ету жүйесін жақсарту бойынша жаңа қадамдар туралы айтты, – деп хабарлайды Taspanews.kz ҚР ДСМ-не сілтеме жасап.
Қазақстан Республикасының Денсаулық сақтау министрлігі пациенттердің, мемлекеттің және өндірушілердің мүдделерін ескере отырып, дәрілік заттарға бағаны қалыптастыру тәсілдерін қайта қарайды. Дәрілердің сапасын бағалауда және оларды іріктеуде тәуекелге бағдарланған тәсілді қолдана отырып өзгерістер жүзеге асырылады, сондай-ақ фармацевтикалық өнімдерді импорттау тәртібі түзетіледі.
Фармацевтикалық және медициналық өнеркәсіпті дамыту жөніндегі ведомствоаралық комиссия құрылды, оның құрамына мемлекеттік органдардың, "Атамекен" Ұлттық палатасының, үкіметтік емес ұйымдардың және бизнес-қоғамдастықтың өкілдері кірді. 2024 жылдың наурыз айында стратегияларды әзірлеуге жауапты бейінді департамент ұйымдастырылды.
Сатып алу тиімділігін арттыру үшін Бірыңғай дистрибьютор дәрілік заттардың жарамдылық мерзімдерін ескере отырып, оларды жоспарлау және бөлу процесін автоматтандыратын ақпараттық жүйені енгізді. Бұл жойылатын дәрі-дәрмектердің санын азайтады.
Бірыңғай дистрибьютордың қызметі өндірушілермен тікелей келісімшарттар жасауға бағытталатын болады. Бұл делдалдардың қызметін қолданбау арқылы дәрі-дәрмектің құнын төмендетуге ықпал етеді.
Ішкі тергеу жүйелі кемшіліктер мен тиісті бақылаудың жоқтығын анықтады, соның салдарынан министрліктің жауапты бөлімшелері мен оның ведомствоға бағынысты ұйымдарының негізгі басшылары қызметтен босатылды.
Қабылданып жатқан шаралар Қазақстан халқын қауіпсіз және сапалы дәрілік заттармен қамтамасыз етуге, сондай-ақ отандық өндірушілерді қолдауға бағытталған.
Еске салсақ, 2024 жылдың бірінші тоқсанында Қазақстанның жоғары аудиторлық палатасы Денсаулық сақтау министрлігі мен оның ведомстволық бағынысты ұйымдарының қызметіне 2022-2023 жылдары баға белгілеуді, сатып алуды, логистиканы, инспекцияларды және дәрілік заттар мен медициналық мақсаттағы бұйымдардың қауіпсіздігін бағалауды реттейтін заңнамадағы бірқатар жүйелік кемшіліктерді анықтай отырып, аудит жүргізді. Бұзушылықтарды жою үшін Жол картасы әзірленіп, бекітілді.
