Инновациялық технологиялар паркі мен Астана хаб біріктіріледі
2025 жылы 2 наурыз күні Мәжіліс бірінші оқылымда инновациялық қызмет саласын мемлекеттік қолдау жүйесін жетілдіру мәселесі бойынша түзетулерді мақұлдады. Заң жобасына сәйкес, мемлекеттік қолдау құралдарын оңтайландыру мақсатында «Инновациялық технологиялар паркі» кластерлік қоры мен «Астана хаб халықаралық технопаркі» біріктірілуі мүмкін, – деп хабарлайды Taspanews.kz ҚР Парламенті Мәжілісіне сілтеме жасап.
Біріктіру негізінде кластерлік қор мен технопарктің қатысушылары үшін бірыңғай құқықтық база мен ортақ преференциялар жасалады.
«Бүгінде жер қойнауын пайдаланушылар өндірістік шығындарының 1 пайызын «Инновациялық технологиялар паркі» инновациялық кластеріне қатысушылардың жобаларына бағыттауға құқылы. Технопарктерді біріктіргеннен кейін «Астана Хаб» қатысушылары да жер қойнауын пайдаланушыларға өз шешімдерін ұсына алады және іріктеу нәтижелері бойынша олардан қаржы ала алады. Бұл ретте «Астана Хабтың» жеңілдетілген салық режимі мен жеделдету бағдарламалары «Инновациялық технологиялар паркі» инновациялық кластерінің басқа қатысушыларына да таралатын болады»,
Қазіргі таңда Астана хаб технопаркі 28 мыңнан астам жұмыс орнын қамтамасыз етеді. 2019-2024 жылдары оның қатысушылары бюджетке 5,5 млрд теңге салық төлеген. Технопарк қатысушыларының қатарында – EdTech CodiPlay стартапы, Alaqan биометрикалық төлем жүйесі, блокчейнмен басқарылатын смарт тақта әзірлеуші Citix және Playrix, Mytona, NetCracker жаһандық технологиялық компаниялары.
