Қару иелері мен күзет қызметімен айналысатындар қызметі тоқтағанда қаруды тапсыруға міндеттеледі
2025 жылы 2 сәуір күні Мәжіліс бірінші оқылымда күзет қызметі мәселелері бойынша өзгерістер мен толықтырулар енгізу туралы Заң жобасын мақұлдады. Оған сәйкес, осы қызмет түрімен айналысатындар үшін талаптарды күшейту көзделді. Заңды тұлғалар қызметін тоқтатқанда қаруды Ішкі істер органына сақтауға тапсыруға міндеттелуі мүмкін, – деп хабарлайды Taspanews.kz ҚР Парламенті Мәжілісіне сілтеме жасап.
Қаруы бар заңды тұлғалар қызметін тоқтатқан соң 15 күн ішінде қару мен патрондарды тапсыруы қажет. Сонымен қатар, заңда белгіленген тәртіппен сынақтық ату үшін азаматтық және қызметтік қарулар (карабин, мылтық, т.б.) тапсырылады.
Шартты орындамаған жағдайда заңды тұлға лицензиядан айырылады.
Ал жеке қызмет ұйымдары жұмысын тоқтатса, уақытша тоқтатса, қайта бастаса немесе заңды тұлға тіркелген жерден тыс жерде қызмет көрсетсе, уәкілетті органдарға 5 жұмыс күні ішінде хабарлау керек.
Одан бөлек, қызметтер тізіміне «күзетілетін объектіде өткізу режимін қамтамасыз ету жөніндегі» жаңа функция енгізіледі. Оны тек лицензиясы бар қауіпсіздік ұйымдары ғана көрсете алатын болады.
Заң жобасына қол қойылған жағдайда, аталған өзгерістер күшіне енеді.
