«Қазақмыс» корпорациясы мен Алюминий зауытында қызметкерлер ұрлыққа барған

Павлодар облысындағы Алюминий зауыты аумағынан металл, ал Ұлытау облысындағы «Қазақмыс» корпорациясынан тауарлық-материалдық құндылықтар ұрланған, – деп хабарлайды Taspanews.kz Polisia.kz сілтеме жасап.

Алюминий зауыты қызметкерлері металлдың кезекті бөлігін шығару кезінде ұсталды. Олар келтірген шығын 30 млн теңгені құрады. Бірнеше рет жасалған ұрлық бойынша қылмыстық іс қозғалып, тергеу жүргізілуде.

«Қазақмыс» корпорациясында қызметкерлерден тұратын 2 топ ұсталды.

«Бірінші жағдайда топ мүшелерінің бірі учаске бастығы болып табылады. Олар 16 млн теңгеден астам сомаға кәсіпорын мүлкін ұрлаған. Екінші топта қылмыстарды жасауға корпорация басқармаларының бірінің басшысы қатысқан. Олар ұрланған заттарды кәсіпорын аумағынан құжаттарды қолдан жасау арқылы шығарып отырған. Аталған фактілер бойынша фигуранттардың құқыққа қарсы әрекеттері туралы дәлелдер жиналды. Барлық күдіктілер ұсталды»,  – деді ІІМ ұйымдасқан қылмысқа қарсы күрес департаментінің өкілі Қуандық Алпыс.

Топ адаммен алдын ала сөз байласу арқылы жасалған ұрлық бойынша тергеп-тексеру жүргізілуде.

«Сондай-ақ «Qarmet» АҚ-дан мүлік ұрлауды ұйымдастырғаны үшін 2023 жылы ұсталған топтардың бірінің мүшелері ұзақ мерзімге сотталғанын атап өту қажет. Осы кәсіпорында ұрлық жасаған басқа да екі ұйымдасқан қылмыстық топқа қатысты тергеу аяқталды. Қылмыстық істер сотқа жіберілді»,  – делінген Polisia.kz келтірген ақпаратта.