Қазақстанда медициналық көмекке ақы төлеудің бірыңғай жүйесін енгізу басталды
Қазақстанда Медициналық көмекке ақы төлеудің бірыңғай жүйесін енгізу аясында қаражаттың есептен негізсіз алынуы болдырмау, медициналық қызметтердің сапасын бақылау сияқты және өзге де қызметтер қолжетімді болады, – деп хабарлайды Taspanews.kz ҚР Денсаулық сақтау министрлігіне сілтеме жасап.
Бұл Мемлекет басшысының денсаулық сақтау саласындағы міндетті әлеуметтік медициналық сақтандыру жүйесінің тиімділігін арттыру тапсырмасы шеңберінде жүзеге асуда.
Осы тапсырма және медициналық мекемелердің жүйені енгізуге дайындық деңгейі, мамандарды оқыту, сарапшылардың құзыреті, сондай-ақ көрсетілетін медициналық көмектің жекелеген түрлеріне тарифтерді қайта қарау сияқты тақырыптар мемлекет басшысының көмекшісі Тамара Дүйсенованың төрағалығымен өткен кеңесте қаралды.
«Жаңа цифрлық жүйе мыналарды қамтамасыз етуге мүмкіндік береді: көрсетілген медициналық көмектің дұрыстығын дербестендірілген есепке алу және түпкілікті бақылау негізінде медициналық қызметтер көрсетудің ашықтықты қамтамасыз ету, қаражаттың есептен негізсіз алынуын болдырмау және медициналық қызметтердің сапасын бақылауды жақсарту, медициналық көмек көрсетудегі қателер мен бұзушылықтарды, соның ішінде «қосып жазулар» деп аталатындарды автоматты түрде анықтау, медициналық қызметтерге ақы төлеу тек нақты көрсетілген көмек үшін жүргізілетініне кепілдік беру»,
Бұл шара медициналық қызметтерді мемлекет тарапымен қаржыландырудың әділеттілігін қамтамасыз етеді.
Жаңа цифрлық құрал Saqtandyrý акпараттық жүйесіне интеграцияланған. Ендігі кезекте, ТМККК және МӘМС шеңберінде медициналық қызметтерді қаржыландырудың ашықтығы мен автоматтандырылуы қамтамасыз етіледі.
Бірыңғай төлем жүйесінің пилоттық нұсқасы Ақмола облысындағы медициналық ұйымдардан басталды. Ол сәтті аяқталған соң, 1 шілдеден бастап жүйені елдегі барлық медициналық мекемелерде енгізу туралы шешім қабылданды.
