Қазақстанда өзін-өзі жұмыспен қамтығандар үшін жеке табыс салығы алынып тасталады
Онлайн платформалар арқылы жұмыс істейтін өзін-өзі жұмыспен қамтыған Қазақстан азаматтары бұдан былай жеке табыс салығын (ЖТС) төлемейді, – деп хабарлайды Taspanews.kz ҚР Үкіметінің баспасөз қызметіне сілтеме жасап.
Бұл жаңашылдық 2025 жылғы 12 ақпанда Павлодар облысының бизнес қауымдастығымен кездесуінде Қаржы вице-министрі Ержан Біржанов мәлімдеген салық заңнамасындағы өзгерістерге қатысты.
«Жылына 15 миллион теңгеге дейін табысы бар жеке тұлғалар енді жеке кәсіпкер ретінде тіркелудің қажеті жоқ. Бұл жаңалық тапсырыстарды іздеу үшін онлайн платформаларды пайдаланатын курьерлер, такси жүргізушілері, қолөнершілер және басқа да өзін-өзі жұмыспен қамтыған адамдардың жұмысын жеңілдетуге бағытталған. Осылайша, олар бюрократиядан арылып, салық жүктемесін азайта алады», — деп түсіндірді Біржанов.
Оның айтуынша, жеке табыс салығының орнына табыстың 4 пайызы ұсталады: 2 пайызы зейнетақы жарналарына, 1 пайызы медициналық сақтандыруға, тағы 1 пайызы әлеуметтік аударымдарға аударылады.
Сондай-ақ, ол бұрын төлемдердің 1 пайызы жеке табыс салығын төлеуге кетсе, енді бұл қаражат өзін-өзі жұмыспен қамтығандардың өзінде қалып, олардың зейнетақысы мен әлеуметтік жинақтарына жұмсалатынын айтты. Алайда, табысы жылына 15 миллион теңгеден асатын болса, өзін-өзі жұмыспен қамтыған адам ҚҚС төлеуші мәртебесіне өтуі қажет.
Бұл өзгеріс 2023 жылы басталған реформаның жалғасы болды – айына 1 миллионға жетпейтін табыс табатын тәуелсіз жұмысшылар үшін жеке кәсіпкер ретінде міндетті тіркеу алынып тасталды. Сондай-ақ салықтар мен әлеуметтік төлемдерді төлеу жауапкершілігі интернет-платформаларға жүктелді. Сонда бірыңғай төлем мөлшерлемесі табыстың 4%-ын құраған – жеке табыс салығы бойынша – 1%, әлеуметтік төлемдер бойынша – 3%.
