Қазақстандық отбасыларға 2025 жылы қанша төлем жасалады
Қазақстанда отбасыларға мемлекеттік қолдау жалғасуда – бала туу және оны күтіп-бағу бойынша төлемдерге 153,6 млрд теңге бөлінді, – деп хабарлайды Taspanews.kz ҚР Еңбек және халықты әлеуметтік қорғау министрлігінің баспасөз қызметіне сілтеме жасап.
2025 жылы мыңдаған қазақстандық мемлекеттік көмек алды. Жыл басынан бері әртүрлі жәрдемақылар мен төлемдер 211,3 мың адамды қамтып, олардың жалпы сомасы 153,6 млрд теңгені құрады.
Бала туу және оны күтіп-бағу жәрдемақылары
Бала тууына байланысты біржолғы төлемБұл жәрдемақы республикалық бюджеттен қаржыландырылады. 2025 жылдың ақпан айында 28,3 мың отбасыға жалпы сомасы 11,2 млрд теңге төленді.
Айта кетсек, бұл төлемге Қазақстан азаматтары ғана емес, қандастар мен ықтиярхаты бар шетелдіктер де үміткер бола алады.
Төлем мөлшері:1, 2 және 3-балаға – 149 416 теңге4 және одан кейінгі балаларға – 247 716 теңге.
Баланың 1,5 жасқа дейінгі күтімі бойынша жәрдемақыБұл төлемді орта есеппен 123 мың адам алады. 2025 жылдың алғашқы екі айында қазақстандық отбасыларға осы жәрдемақы бойынша 7,2 млрд теңге төленді.
Еңбек министрлігінің мәліметінше, төлем мөлшері отбасыдағы бала санына байланысты. Сонымен қатар, жыл басынан бері барлық жәрдемақылар 6,5%-ға индексацияланып, сомасы ұлғайған.
Жұмыс істейтін ата-аналарға арнайы төлемдер Жұмыс істейтін ата-аналар үшін бала күтімімен байланысты басқа да әлеуметтік төлемдер қарастырылған. Мысалы, жүктілік пен босануға байланысты төлемдер соңғы 12 айдағы жалақыға негізделіп есептеледі. Тек осы бағытта ғана қаңтар-ақпан айларында 43,4 мың адамға 61,1 млрд теңге төленді.
Министрлік атап өткендей, егер отбасында егіз немесе үшем дүниеге келсе, жәрдемақы әр балаға жеке тағайындалады.
