Қазақстанның кей облыстарында демалыс күндері дауыл орнайды
15 желтоқсанда Қазақстанның басым бөлігінде ауа-райы айтарлықтай нашарлайды, – деп хабарлайды Taspanews.kz Қазгидрометке сілтеме жасап.
Болжамға са й, еліміздің басым бөлігінде тұрғындарды қарлы боран, көктайғақ, күшті жел және жаңбыр мен қар түріндегі жауын-шашын күтуде, бұл көлік қозғалысына қосымша қауіп тудыруы мүмкін.
Астанада 15 желтоқсанда жауын-шашын аралас болады, яғни жаңбыр мен қар жауады. Көктайғақ болып, таңертең тұман түседі. Күндіз және түнде температура -5-7 °C. Оңтүстік-батыстан соққан жел жылдамдығы күндіз секундына 15-20 метрге дейін жетеді.
Ақтөбе облысының солтүстік және батыс аймақтарында түнде бұрқасын болады, жел екпіні секундына 15-18 метрге дейін күшейеді. Облыс орталығы Ақтөбеде осындай көрініс байқалады: түнгі қарлы боран қозғалысты қиындатады.
Жамбыл облысының батыс, оңтүстік және таулы аймақтарында нөсер жауын болады, қар жауады. Өңірдің басым бөлігін қар жауып, көктайғақ орын алады. Оңтүстікте және таулы аймақтарда тұман түсіп, жел екпіні секундына 23-28 метрге жетеді. Таразда күндіз қалың қар жауып, боран соғады, көктайғақ болады.
Алматыда күндіз батыстан соққан жел екпіні секундына 15 метрге жетеді. Күндіз ауа температурасы +5+7 °C, түнде -1-3 °C.
Қонаевта секундына 18-23 метрге жететін жел болжанады, бұл тұрғындардан ерекше назар аударуды талап етеді.
Қарағанды облысында, әсіресе солтүстік және шығыс аудандарында бұрқасынмен және көктайғақпен бірге жүретін жаңбыр мен қар түріндегі жауын-шашын болжанады. Облыс оңтүстігінде тұман түсуі мүмкін. Оңтүстік-батыстан соғатын жел екпіні кей жерлерде секундына 23 метрге жетеді. Қарағандыда да жағдай ұқсас: жауын-шашын аралас келеді және қарлы боран болады.
Ұлытау облысының солтүстік және шығыс аумақтарында түнде жауын-шашын, облыстың қалған бөлігінде аздаған жауын-шашын болады. Орталық бөлігінде көктайғақ болжанады, солтүстігі мен шығысында бұрқасын болады, тұман түсуі мүмкін. Жезқазғанда жауын-шашын азырақ.
Батыс Қазақстан облысының солтүстік және орталық аймақтарында бұрқасын мен көктайғақ болады. Оралда солтүстік-батыстан соққан жел секундына 18 метрге жетіп, ауа-райының қиын жағдайын күшейтеді.
Атырау облысының солтүстік және шығыс аумақтарында бұрқасын болады. Облыстың оңтүстігінде батыстан соғатын жел секундына 15-20 метрге дейін күшейеді. Осындай ауа-райы құбылыстары Атырау қаласында да болуы мүмкін.
Жетісу облысында, әсіресе, Алакөл көлінің аумағында солтүстік-батыстан соғатын жел екпіні секундына 30 метрге жетеді. Облыстың солтүстік бөлігінде көктайғақ болып, тұман түседі.
Абай облысының батыс, солтүстік және орталық аймақтарында бұрқасын, көктайғақ болады. Оңтүстік-шығыстан соғатын жел екпіні секундына 28 метрге дейін жетеді, Жарма өңірінде бұл әсіресе байқалады. Семейде күндіз бұрқасын, көктайғақ болады, жел екпіні секундына 20 метрге жетеді.
