Қорғалжын табиғи қорығына апаратын жол жөндеуден өтеді
Фото: ҚР Көлік министрлігі
Қазақстан Республикасы Көлік министрі Марат Қарабаевтың Ақмола мен Қостанай қалаларына барған жұмыс сапары аясында Астана – Қорғалжын жолы жөндеуден өтетіні белгілі болды, – деп хабарлайды Taspanews.kz ҚР Көлік министрлігіне сілтеме жасап.
Ақмол ауылынан Оразақ ауылына дейінгі жолды орташа жөндеу 2024 жылы басталған. Жөндеу жұмыстарының бірінші кезеңі 2025 жылы аяқталады. Келесі кезекте Оразақ ауылынан Қорғалжын қорығына дейінгі 110 шақырым жол жөнделеді.
«Қорғалжын ауылынан қорыққа дейінгі жол учаскесі ерекше назарда. Бұл жол өткен ғасырдың 60-жылдары салынған және қазіргі таңда асфальтобетон жамылғысы жоқ топырақ төсемінен ғана тұрады. Енді жаңа жол салынып, қауіпсіз көлік қозғалысы қамтамасыз етіледі. Бұл туристік ағынның артуына және өңірдегі шағын және орта бизнестің дамуына оң ықпал етеді»,
Жолды жаңғырту облысаралық және ауданаралық күре жолдарды ауқымды жөндеу жұмыстарынан өткізу аясында орын алды. Бұл Президенттің тапсырмасы. Осылайша, 2026 жылы тағы 2 мыңнан астам жол жөнделмек.
