Оқу-ағарту министрлігі Семейде соққыға жығылған баланың видеосын таратпауды сұрады
Семей қаласында соңғы күндері әлеуметтік желілерде жасөспірімдер тобының кәмелетке толмаған баланы қатыгездікпен ұрып-соққан видеосы кеңінен таралуда, – деп хабарлайды Taspanews.kz облыстық Полиция департаментіне сілтеме жасап.
Қазақстан Республикасы Оқу-ағарту министрлігінің Балалардың құқықтарын қорғау комитеті бұл видеоны әрі қарай таратуды тоқтатуға шақырды.
Министрлік әсіресе кейбір блогерлер мен әлеуметтік желі қолданушылары зардап шеккен баланың фотосуреттерін жариялап, оның жеке басына қатысты ақпарат таратуын алаңдаушылықпен қабылдады.
Бұл әрекеттер баланың психологиялық жағдайына теріс әсер етуі мүмкін.
«Бұқаралық ақпарат құралдары туралы» заңның 14-бабы, 5-тармағына сәйкес, кәмелетке толмаған зардап шегушінің жеке және биометриялық деректерін, фотосуреттерін және жеке басын анықтайтын ақпаратты жариялауға тыйым салынады.
Ресми ескерту
Абай облысының полиция департаменті БАҚ өкілдері мен азаматтарды баланың психоэмоционалдық жағдайына зиян келтіретін материалдарды жарияламауға шақырды.Мұндай видеоларды тарату баланың құқықтарын бұзып қана қоймай, зорлық-зомбылық әрекеттерін қоздыруы мүмкін.
