ШЫҰ Әділет министрлерінің он бірінші кеңесі онлайн режимде өтті

ШЫҰ Әділет министрлерінің он бірінші кеңесі онлайн режимде өтті, - деп хабарлайды Taspanews ведомствоның баспасөз қызметіне сілтеме жасап.

Қазақстан Республикасының Әділет министрі Азамат Есқараевтың төрағалығымен өткен шараға Үндістан, Иран, Қырғызстан, Пәкістан, Ресей, Тәжікстан, Өзбекстан және Қытай Халық Республикасының Әділет министрлері қатысты. Отырысқа ШЫҰ Бас хатшысының орынбасары да қатысты, Беларусь Республикасының Әділет министрі Евгений Коваленко бақылаушы мемлекет ретінде қатысты.

Кездесу барысында қатысушылар 2023 жылы оныншы кездесуде қол жеткізілген ынтымақтастықты қорытындылады. Әділет министрлері соңғы жылдары ШЫҰ аясында құқықтық және соттық өзара іс-қимылды дамытудың маңыздылығын атап өтті. Тұрақты кездесулер ШЫҰ-ға мүше мемлекеттердің әділет органдары арасындағы ведомствоаралық ынтымақтастықты тереңдетуге ықпал етеді.

Қазақстанның Әділет министрі ынтымақтастық пен озық тәжірибе алмасуды жақсарту үшін құқық пен сот төрелігін цифрландыру саласында Меморандум жасасуды ұсынды.

Отырыс соңында Бірлескен мәлімдемеге қол қойылып, заң қызметі және сот-сараптама қызметі бойынша сарапшылар жұмыс топтарының 2024-2026 жылдарға арналған іс-шаралар жоспарлары бекітілді.