Түркістан облысында он айлық қыз үйінен шығып кетті
Фото: ҚР ІІМ
Түркістан облысында анасы үй шаруасымен айналысып жатқанда небәрі он айлық сәби үйден ақырын жорғалап шығып кетті, - деп хабарлайды Taspanews ҚР Ішкі істер министрлігінің порталына сілтеме жасап.
Таңертеңгі сағат 9-дар шамасында Бәйдібек аудандық ішкі істер бөліміне түскен хабарламаға облыстық ішкі істер департаменті шұғыл әрекет етті. Баланы көшеде жалғыз тауып алған жергілікті тұрғын хабарласқан. Полицейлер сәбидің жағдайын бірден анықтап, туыстарын іздеуге кірісті. Тәртіп сақшылары әдістемелік тұрғыда аумақты аралап, куәгерлер мен өтіп бара жатқан адамдардан сұрастырды.
Нәтижесінде, бір сағаттың ішінде баланың қайда тұратынын анықтап, оны анасына қайтаруға мүмкіндік туды. Белгілі болғандай, анасы өз ісімен айналысып жатқанда, қыз құлпы ашылған есікті пайдаланып, сыртқа шығып кеткен.
Қыздың анасы полиция қызметкерлеріне жедел әрекет еткені үшін шексіз алғысын білдірді.
