Жезқазғанда шетел азаматтығын дер кезінде хабарламаған тұрғынға айыппұл салынды

Жезқазған қаласының әкімшілік құқықбұзушылықтар жөніндегі мамандандырылған соты Ресей азаматтығын алғанын уақытында хабарламаған азаматқа айыппұл салды, – деп хабарлайды Taspanews.kz Бас прокуратураға сілтеме жасап.

Жезқазған қаласының әкімшілік құқық бұзушылықтар жөніндегі мамандандырылған соты азамат «Г.»-ның Қазақстан азаматтығынан шығып, Ресей Федерациясының азаматтығын алғаны туралы дер кезінде хабарламағанын анықтады. Ол 2024 жылғы 11 қарашада Ресей азаматы атанғанымен, Қазақстанның құзырлы органдарына бұл туралы белгіленген мерзімде мәлімдемеген және жеке куәлігін тапсырмаған.

Сотта азамат «Г.» өз кінәсін мойындап, мұндай талап бар екенін білмегенін айтты. Алайда, Қазақстан Республикасының Әкімшілік құқық бұзушылық туралы кодексінің 496-бабының 2-бөлігіне сәйкес, шетел азаматтығын алғанын хабарламау 200 АЕК (738 400 теңге) айыппұл салуға немесе елден шығаруға әкеп соғады.

Сот шешімімен азаматқа 200 АЕК мөлшерінде айыппұл салынды. Алайда, Қазақстан Республикасының ӘҚБтК-нің 829-11-бабының 2-бөлігіне сәйкес, айыппұл сомасы 30%-ға азайтылып, 516 880 теңге болды.

Сот Қазақстан азаматтарына көші-қон заңдарын қатаң сақтауды, шетел азаматтығын алған жағдайда уақытылы хабар беруді ескертеді. Әйтпесе, заң бұзғандар ірі көлемдегі айыппұл немесе елден шығару жазасына тартылуы мүмкін.