«Жүрегімнің бір бөлшегін тілім етіп, біреу жұлып алғандай»: Депутат Дәулет Мұқаевтың анасы қайтыс болды

ҚР Парламенті Мәжілісінің депутаты Дәулет Мұқаевтың анасы қайтыс болды. Ауыр дертпен күрескен Күлпаш Кәкімсейітқызы екі айдай ауруханада жатқан. Депутат анасына жан тебірентер жазба арнады. Бұл туралы Taspanews.kz Дәулет Мұқаевтың Instagram-дағы ресми парақшасына сілтеме жасап хабарлайды. 

«Анашым, маматайым, мама! Соңына дейін сендік қой, бәрі жақсы болып кететініне. Біз бәріміз бірге дертпен күрестік, бірақ бұл дерт (аутоиммундық ауру) бізден де күшті болып шықты. Ауру жайлы кейін тағы айтармын. Себебі үлкен зерттеуді қажет етеді, сирек кездесетін ауру. Елде емдеу протоколы да жоқ. Жас болашақ дәрігерлер отандық медицина үшін үлес қосулары қажет. Анам ауруханаға жатқан күн 27 мамыр, көктем еді. 60 күн бойы ауруханада жатып, бір емес үш рет реанимацияға түсу деген қиынның қиыны. Жүрекке де, жанға да, миға да оңай емес. Анам ауырып жатқанын ешкімге айтпауды өтінді», – деп жазды Мұқаев.

Оның сөзінше, анасы ауырып жатқанын ешкімге айтпауды өтінген.

«Тек жақындары білдік. Сіздердің алдарыңызда менің жүзім күліп жүргенімен, жүрегім елжіреп, жылап жүрді. Көзден аққан жас пен іштегі өксігім тек өзіме және бір Аллаға аян болды. Өзгеге көрсетпедім, ішімнен «мен мықтымын, мен сынбауым керек, әйтпесе, анамды кім емдейді» деген оймен жүрдім. Мен үшін осы 60 күннің әр күні арпалыс, күрес, уайым, белгісіздік, шарасыздық, ұйқысыз түндер, дұғамен өтті. «Амал нешік, Алланың әмірі, Алланың қалауы»  деген оймен өзімді жұбатудамын. Бірақ ауызбен айта салу қиын. Жүрегімнің бір бөлшегін тілім етіп, біреу жұлып алғандай сезім. Қабырғам қайысуда. Ата-анам менің қос қанатым болса, бір қанатым сынып, құздан құлап бара жатқанымдай әсер...», – деп жан сырын ақтарды депутат.

Taspanews редакциясы Дәулет Мұқаев пен оның жақындарына қайғыра көңіл айтады.