Алматы маңында жер сілкінісі тіркелді

Қазақстанның сейсмологтары Қырғызстанда жер сілкінісі болғанын тіркеді, – деп хабарлайды Taspanews.kz СБЗҰҒО жедел деректеріне сілтеме жасап.

Қазақстан Республикасы Төтенше жағдайлар министрлігі Сейсмологиялық байқау және зерттеулер ұлттық ғылыми орталығының сейсмологтары 2025 жылғы 3 наурызда Астана уақытымен сағат 11:05-те жер сілкінісін тіркеді.

«Жер сілкінісінің ошағы Алматыдан оңтүстік-батысқа қарай 122 шақырым жерде, Қырғызстан аумағында болды. Координаттары: солтүстік ендік 42,155°, шығыс бойлық 76,487°. Жер сілкінісінің ошағы 15 шақырым тереңдікте болған», – делінген сейсмологтардың мәлімдемесінде.

Мамандардың айтуынша, жер сілкінісінің магнитудасы 4,3 MPV, энергетикалық класы 9,9. Салыстырмалы түрде жоғары көрсеткіштерге қарамастан, Қазақстанның елді мекендерінде сейсмикалық белсенділік MSK-64 шкаласы бойынша есептеліп, 0 баллды құрады.

Қазақстан аумағында дүмпу сезілмеді.

Бұрынырақ та бұл аймақта әртүрлі күшті дүмпулер байқалатын. Бұл Тянь-Шань таулары бойындағы жерлерге тән құбылыс.